Takimi i liderëve të partive opozitare në Kosovë me kryeministrin Albin Kurti për të zgjidhur krizën parlamentare dhe për të votuar kryetarin e Kuvendit ka mbaruar pa konsensus. Si fitues i zgjedhjeve të shkurtit, Kurti i ftoi partitë opozitare në takim për të arritur në një dakordësi, por meqë konsensus nuk pati Kurti tha për mediat se është koha për kompromise.
“U pa se konsensus nuk ka tani na mbetet kompromisi. Kam ofruar 2 opsione kompromisi. I pari është që nëse nuk merr votat me votim të fshehtë Albulena Haxhiu tërhiqet nga kandidatura. Pra do të ketë vetëm një votim. Kompromisi i dytë është një marrëveshje politike në lidhje me 67 të kushtetutës, për votim të fshehtë. Ne jemi fitues, dhe nuk ka sesi humbësit të përcaktojnë kryetarin e Kuvendin. PDK dhe LDK e kanë keqlexur dhe po e keq interpretojnë publikisht aktgjykimin e Gjykatës Kushtetuese”, tha Kurti.
Ndërsa Kryetari i PDK-së, Memli Krasniqi dhe ai i LDK-së, Lumir Abdixhiku e quajtën takimin farsë dhe të pasuksesshëm.
“I gjithë ky takim ishte një farsë publike. Qëndrimet e deputetit Kurti ka qenë pak a shumë janë të njëjta dhe nuk as respektonin dhe interpretonin njëjtë vendimin e Kushtetueses”, tha Abdixhiku.
Kuvendi i ri të ngrihet brenda 30 ditësh, kështu urdhëroi para pak ditësh Gjykata Kushtetuese e Kosovës, e cila theksonte se deputetët janë të detyruar që brenda këtij afati të zgjedhin kryetarin dhe nënkryetarët e kuvendit.
Deri më tani kanë dështuar 37 seanca për konstituimin e kuvendit, pasi propozimi i LV që Albulena Haxhiu të bëhet kryetare Kuvendi, nuk pranohet nga opozita pasi është një figurë që nuk po pranohet nga palët. Seanca e radhës pritet të mbahet të dielën e 29 qershorit.
