Projekti për modelin elektrik ID. Golf është ndalur përkohësisht nga Volkswagen, ndërsa kompania po përpiqet të reduktojë shpenzimet dhe të menaxhojë më me kujdes investimet.
David Powels, drejtuesi financiar i Volkswagen, konfirmoi se puna për këtë model do të qëndrojë e pezulluar derisa të sigurohen fondet e nevojshme.
Megjithatë, vendimi nuk përbën anulim të Golfit elektrik. Sipas kompanisë, zhvillimi i tij mund të rifillojë në të ardhmen, edhe pse ende nuk është përcaktuar një datë konkrete.
Debutimi i modelit ishte parashikuar për fundin e kësaj dekade, por problemet me softuerin, kostot e larta dhe vonesat në zhvillimin e platformës së re elektrike SSP kanë ndryshuar planet fillestare.
Në këto rrethana, viti 2030 konsiderohet një afat më realist për prezantimin e Golfit elektrik.
Ndërkohë, Volkswagen do të vijojë prodhimin e versioneve aktuale të Golfit me motorë me djegie të brendshme, si edhe të varianteve hibride.
Kompania po përgatit gjithashtu transferimin e prodhimit të Golfit nga Gjermania në Meksikë gjatë vitit 2027, në kuadër të përpjekjeve për uljen e kostove.
The post Volkswagen vendos në pritje projektin e Golfit elektrik appeared first on Albeu.com.
