Mungesa e fuqisë punëtore të kualifikuar, korrupsioni dhe administrata joefikase mbeten vështirësitë kryesore me të cilat përballen kompanitë në Bullgari.
Këtë tregon sondazhi i katërt i mjedisit të biznesit, i kryer midis anëtarëve të Dhomës Franceze-Bullgare të Tregtisë dhe Industrisë (FBCCI), nga agjencia e sondazheve Ipsos, midis 31 janarit dhe 14 shkurtit 2025. Këto probleme u përmendën nga përkatësisht 54%, 33% dhe 25% e të anketuarve dhe mbeten pengesa kryesore e biznesit në fund të vitit 2023
Lajmi i mirë është se në përgjithësi, kompanitë thonë se po përballen me më pak vështirësi se më parë. Vetëm 36% thonë se kanë vështirësi, krahasuar me 56% në periudhën e mëparshme. Një tjetër lajm i mirë është se kornizat e pasigurta rregullatore, burokracia dhe paqëndrueshmëria politike, po përmenden më rrallë si probleme, tha agjencia Ipsos.
Në anketë morën pjesë 66 kompani anëtare të FBCCI-së. Ky është sondazhi i katërt, ndërsa të mëparshmit u mbajtën në vitet 2019, 2020 dhe 2023. Shumica e kompanive të anketuara (80%) operojnë në sektorin e shërbimeve. Mbizotërojnë firmat e vogla (1/3 e të anketuarve), ku më shumë se një e katërta janë kompani të mesme
Një mjedis i mirë biznesi i dëmtuar nga pesimizmi për ekonominë
Dy të tretat e kompanive besojnë se Bullgaria është një vend investimi mjaft tërheqës, i cili ka ruajtur të njëjtën prirje gjatë viteve të anketimit. Nuk është për t’u habitur që si përparësi kryesore përmenden normat e taksave për kompanitë dhe qytetarët (85% e të anketuarve), anëtarësimi në BE (77%) dhe kostot e ulëta të punës (44%). Megjithatë, duhet theksuar se në anketën e mëparshme, kostot e punës janë përmendur si përparësi nga 54% e të anketuarve.
Gjendja ekonomike në vend tani për tani cilësohet si e kënaqshme nga 42% e të anketuarve, ndërsa një e pesta mendon se situata ekonomike është “e mirë”. Sidoqoftë, ka pasur një rritje të përshtypjeve negative, ku 30% e të anketuarve kanë dhënë një vlerësim të dobët, krahasuar me 15% në vitin 2023. Afërsisht, 4 nga 10 kompani besojnë se gjendja ekonomike e vendit do të mbetet e qëndrueshme këtë vit.
Fuqia punëtore
Pavarësisht vështirësive në gjetjen e punëtorëve, vlerësimi i përgjithshëm i aftësive të fuqisë punëtore në Bullgari, mbetet pozitiv. Në përgjithësi, 85% e të anketuarve thanë se niveli i punësimit ishte i kënaqshëm ose i mirë, me rezultate të krahasueshme me anketat e mëparshme. Mbi gjysma e kompanive (61%) planifikojnë të punësojnë staf të ri këtë vit, dhe një e pesta janë të pasigurta. Një përqindje edhe më e madhe (18%) thonë se nuk do të zgjerojnë ekipet e punës. Shumica dërrmuese e firmave (62%) do të vazhdojnë të investojnë në trajnimin e stafit, por 20% jo.
Për sa u përket planeve të kompanive për të investuar në ndërtesa dhe makineri këtë vit, përqindja e atyre që nuk synojnë të investojnë është ende e madhe.
Optimiste për euron
Kompanitë mbeten optimiste për efektet e hyrjes së euros në Bullgari, me qëndrime më pozitive me kalimin e kohës. Më shumë se gjysma e kompanive janë shumë ose jashtëzakonisht optimiste, ndërsa vetëm një e katërta mendojnë se hyrja e euros nuk do të çojë në rritje ekonomike. “Këto janë rezultatet më të larta pozitive të anketuara, pra ka një prirje të qartë optimiste për sa i përket euros”, tha Ipsos.
Në përgjithësi, kompanitë janë të kënaqura me investimin në vend, ku 47% e vlerësojnë atë si fitimprurës dhe 35% thonë se nuk janë penduar. Megjithatë, burokracia u përmend si pengesë në kryerjen e biznesit nga 30% e të anketuarve. Tre të katërtat e tyre besojnë se projektet në Bullgari janë zhvilluar ashtu siç prisnin.
Zhvillimi profesional i grave në Bullgari
Më shumë se gjysma e grave janë të kënaqura me rrugën e karrierës dhe vendin e punës në Bullgari, sipas një studimi të veçantë të FBCCI-së, të përgatitur në bashkëpunim me agjencinë Ipsos dhe grupin e kozmetikës Naos. Studimi përfshin 644 anketa dhe 10 intervista të hollësishme. Rezultatet tregojnë se ka një prirje pozitive për gratë në vendin e punës, ku 59% thonë se ndihen të mbështetura nga punëdhënësi në zhvillimin e tyre profesional.
Gratë e brezit X (mbi 45 vjeç) dhe ato në pozicione drejtuese, ndihen më të kënaqura me punën e tyre. Shumica po punojnë në specialitetin që kanë studiuar.
Të anketuarat pajtohen se sistemi arsimor duhet të përshtatet me nevojat e biznesit dhe vetëm 23% besojnë se Bullgaria mundëson arsim cilësor që plotëson nevojat e tregut të punës. Femrat e brezit Z (ato që kanë lindur midis viteve 1996 dhe 2010) janë më pesimiste në këto çështje. Megjithatë, 94% e të anketuarave besojnë se trajnimi i vazhdueshëm dhe kualifikimet shtesë janë të rëndësishme për zhvillimin profesional. / Kapital.Insight
The post Mungesa e fuqisë punëtore është pengesa kryesore për biznesin në Bullgari appeared first on Revista Monitor.
