Drejtoria e Përgjithshme e Doganave mirëpriti në Tiranë përfaqësues nga DG TAXUD dhe të gjitha palët e CEFTA-s, në takimin e parë zyrtar të Trupit Këshillimor për Bashkëpunimin Doganor në Klasifikimin Tarifor dhe Rregullat e Origjinës.
Në fjalën e hapjes, Drejtori i Përgjithshëm Genti Gazheli theksoi rëndësinë e këtij momenti për forcimin e bashkëpunimit rajonal dhe përafrimin me standardet e Bashkimit Europian:
“Krijimi i këtij Trupi Këshillimor është një nga arritjet më të rëndësishme të Presidencës Shqiptare të CEFTA-s, duke ndihmuar në forcimin e bashkëpunimit dhe krijimin e një mjedisi më të parashikueshëm për tregtinë,” u shpreh ai.
Takimi shënoi gjithashtu përmbylljen me sukses të Presidencës Shqiptare të CEFTA-s, gjatë së cilës u arritën rezultate të rëndësishme në:
– Zbatimin e rregullave të reja të origjinës (PEM Convention)
– Njohjen reciproke të Operatorëve Ekonomikë të Autorizuar (AEO)
– Bashkëpunimin doganor në tregtinë elektronike (e-commerce) dhe shkëmbimin digjital të të dhënave përmes SEED+
– Zgjerimin e “Green Lanes” për lëvizje më të shpejtë të mallrave në rajon dhe me BE.
The post Mblidhet në Tiranë Trupi Këshillimor i CEFTA-s për Bashkëpunimin Doganor appeared first on Revista Monitor.
