“Tregtia Takaichi” nxit optimizëm në tregje, me pritshmëri për rritje të shpenzimeve për mbrojtjen, ulje taksash dhe rihapje të centraleve bërthamore.
Aksionet japoneze u rritën ndjeshëm pasi Sanae Takaichi u zgjodh nga parlamenti si kryeministrja e parë grua në historinë e vendit, ndërsa tregjet reaguan me optimizëm ndaj politikave të pritshme të qeverisë së saj.
Indeksi referues Nikkei 225 u rrit me 1.5% të martën, duke arritur mbi 49,900 pikë, pranë nivelit rekord 50,000. Në total, indeksi është rritur me mbi 26% që prej fillimit të vitit.
Takaichi mori 237 vota në Dhomën e Ulët të Parlamentit me 465 vende, pas marrëveshjes së arritur një ditë më parë mes Partisë Liberaldemokrate (LDP) dhe partisë reformiste Japan Innovation Party (JIP). Koalicioni i ri pritet të diskutojë rritjen e shpenzimeve për mbrojtjen, ulje të mundshme taksash dhe riaktivizimin e centraleve bërthamore të ndaluara që prej katastrofës së Fukushimës në vitin 2011.
Burime pranë LDP-së thanë se Takaichi, ish-prezantuese televizive dhe përkrahëse e politikave të Margaret Thatcher, pritet të emërojë Satsuki Katayama, ish-ministre e Rilindjes Ekonomike, si Ministren e parë të Financave grua në historinë e Japonisë. Ajo po ashtu planifikon të krijojë një kabinet me numrin më të madh të grave që vendi ka pasur ndonjëherë.
Ndërkohë, jeni vazhdoi të dobësohej ndaj dollarit amerikan, duke rënë nën nivelin prej 151, për shkak të pritshmërive se Banka e Japonisë mund të shtyjë rritjen e normave të interesit në mbledhjen e ardhshme të politikës monetare.
Euforia në tregun e aksioneve pasoi nënshkrimin e marrëveshjes së re të koalicionit midis LDP-së, që ka qeverisur Japoninë për pjesën më të madhe të 70 viteve të fundit, dhe JIP-it, një parti 15-vjeçare që ka fituar mbështetje të fortë në rajonin e Osakës.
Hirofumi Yoshimura, guvernatori i Osakës dhe bashkëkryetar i JIP-it, deklaroi pas votimit se “dëshira e zjarrtë e kryeministres Takaichi për ta përmirësuar realisht Japoninë u ndje qartë.”
Formimi i koalicionit LDP–JIP vjen pas shpërbërjes së aleancës 26-vjeçare të LDP-së me partinë Komeito, e cila, ndonëse ndante shumë objektiva të përbashkëta, shpesh pengonte iniciativat më të mëdha politike. JIP-i, sipas drejtuesve të tij, është më afër LDP-së në qëndrimet për rritjen e shpenzimeve ushtarake dhe rihapjen e reaktorëve bërthamorë, shumica e të cilëve qëndrojnë të mbyllur që prej vitit 2011.
Neil Newman, strateg në Astris Advisory, tha se për shkak të interesit të lartë të investitorëve të huaj për aksionet japoneze, ai e ka rritur objektivin e tij të fundvitit për Nikkei 225 në 51,500 pikë.
Zgjedhja e Sanae Takaichi shënon një moment historik për Japoninë, jo vetëm për faktin që vendi merr për herë të parë një grua në postin më të lartë politik, por edhe për pritshmëritë që kjo lëvizje do të sjellë ndryshime të thella në ekonominë, mbrojtjen dhe energjinë japoneze. / FT
The post Japonia emëron kryeministren e parë grua, tregjet reagojnë me optimizëm appeared first on Revista Monitor.
