Vendi mbetet prapa në shumë tregues të tjerë
Ekonomia e Indisë do të arrijë një moment historik në fillim të vitit 2026. Deri në fund të vitit fiskal, në mars, ajo do të tejkalojë Japoninë duke u bërë ekonomia e katërt më e madhe në botë, dhe do të jetë shumë pranë vendit të tretë, Gjermanisë.
Ky moment nuk ka të bëjë vetëm me lavdi apo krenari. Ai tregon për një përparim të jashtëzakonshëm. Në fillim të këtij shekulli, Japonia ishte fuqia më e madhe ekonomike pas SHBA-së, ndërsa India nuk renditej as në dhjetëshen e parë. Që atëherë, India ka kaluar Brazilin, Meksikën dhe Kanadanë, disa vende europiane, si edhe ish-kolonizatorin e saj, Mbretërinë e Bashkuar. Fondi Monetar Ndërkombëtar (FMN) parashikon se deri në vitin 2030 do të renditet pas vetëm SHBA-së dhe Kinës.
Frytet e këtij lulëzimi janë të dukshme në gjithë vendin. Qytetet e Indisë janë mbushur me qiejgërvishës dhe banesa luksoze; autostradat e saj janë të mbingarkuara me automjete; tregjet e aksioneve janë të mëdha dhe në lulëzim. Më e rëndësishmja, qindra milionë njerëz kanë dalë nga varfëria ekstreme. Një klasë e mesme është krijuar, me rreth 400 milionë njerëz dhe në rritje e sipër. Indianët, dhe qeveria e tyre, kanë plot arsye të festojnë sukseset e tyre.
Por ende nuk duhet të hapin shishen e shampanjës. Pavarësisht gjithë kësaj rritjeje, India mbetet një vend i varfër. Një tregues më domethënës i zhvillimit të Indisë sesa madhësia e ekonomisë është PBB-ja për frymë. Edhe pse së shpejti do të kalojë Japoninë në PBB totale, këto të mira shpërndahen për më shumë se 11 herë më shumë njerëz. E përshtatur me koston e jetesës, India renditet e 126-ta në këtë tregues. Ky është një përmirësim krahasuar me 25 vite më parë, kur renditej e 152-ta. Por me pak mbi 12,000 dollarë për person, afërsisht në të njëjtin nivel me Jordaninë ose Uzbekistanin, ajo arrin vetëm rreth dy të tretat e mesatares së ekonomive në zhvillim.
Një mënyrë tjetër për të parë ngjitjen ekonomike të Indisë është të shqyrtohet nëse jeta e njerëzve të saj është përmirësuar. Shkalla e varfërisë ekstreme ra nga 27% në vetëm 5% gjatë dekadës deri në vitin 2022, sipas Bankës Botërore. Por shifrat absolute mbeten tronditëse. Në vitin 2022, 75 milionë vetë, më shumë se popullsia e Mbretërisë së Bashkuar, jetonin me më pak se 3 dollarë në ditë. Edhe 267 milionë të tjerë, rreth dyfishi i popullsisë së Meksikës, mbijetonin me më pak se 4.20 dollarë në ditë. Vendi renditet i 102-ti nga 123 vende në Indeksin Global të Urisë.
India renditet dobët edhe në shumë renditje dhe tregues të tjerë. Ajo është e 176-ta nga 180 vende në një indeks të performancës mjedisore të hartuar nga Universiteti Yale; e 151-ta nga 180 vende në indeksin për lirinë e shtypit të publikuar nga Reporters Without Borders; dhe e 41-ta në indeksin e demokracisë të përpiluar nga Economist Intelligence Unit.
Udhëheqja e një ekonomie nga një nivel relativisht i ulët në mesin e më të mëdhave në botë përfaqëson një arritje të madhe nga liderët e Indisë. Por madhësia nuk është gjithçka. Ashtu siç do të dëshmonin qindra milionë indianë, cilësia e jetës ka po aq rëndësi./ The Economist
The post India do të bëhet ekonomia e katërt më e madhe në botë appeared first on Revista Monitor.
