Kancelari gjerman Friedrich Merz dhe presidenti francez Emmanuel Macron kanë arritur një marrëveshje për reformimin e gjerë të politikës së automobilave në Evropë.
Me kërkesë të Merz, plani për heqjen graduale të motorëve me djegie të brendshme, që parashikohet të nisë në vitin 2035, do të zbutet më shumë sesa propozimi i mëparshëm i Komisionit Evropian.
Gazeta ekonomike Handelsblatt raporton se kancelari gjerman siguroi gjithashtu heqjen e detyrimit që shtetet anëtare të përdorin kuota të detyrueshme për të nxitur elektrifikimin e flotave të mëdha të automjeteve të kompanive.
Në këmbim, Macron siguroi përfshirjen e kërkesës së tij për rregulla më të rrepta “Made in EU”. Sipas tyre, qeveritë do të ofrojnë stimuj për blerje dhe do të lidhin kontrata publike vetëm për automjete të prodhuara në Evropë.
Po ashtu, një pjesë gjithnjë e më e madhe e baterive dhe e komponentëve kryesorë të automjeteve duhet të prodhohet në Evropë. Subvencionet qeveritare do të drejtohen kryesisht te prodhimi evropian i automjeteve.
Sipas gazetës, Gjermania dhe Franca synojnë të sigurojnë miratimin e këtyre rregullave në Këshillin e BE-së. Në këmbim të kërkesave për politikën industriale, Gjermania arriti të marrë lëshime të gjera për objektivat klimatike.
Handelsblatt shkruan se automjetet britanike do të trajtohen si evropiane nëse Londra i përshtat masat e saj mbrojtëse tregtare me standardet e BE-së. /AA/
The post Gjermania dhe Franca arrijnë marrëveshje për ndryshimin e politikës evropiane të automobilave appeared first on Albeu.com.
