Qeveria ka vendosur të japë me qira një tokë me sipërfaqe 10,000 m2 në qytetin e Korçës, për vetëm 1 euro. Kjo pronë shtetërore i është dhënë një investitori strategjik “Investment and Development Albania” sh.p.k, i cili do të ndërtojë projektit “Green House Korça Resort”.
“Dhënien e miratimit për lidhjen e kontratës së qirasë, me tarifën 1 (një) euro/kontrata, ndërmjet Ministrisë së Ekonomisë, Kulturës dhe Inovacionit, si qiradhënës, dhe shoqërisë “Investment and Development Albania”, sh.p.k., me NUIS L91703053C, si qiramarrës, për pronën e paluajtshme shtetërore në zonën kadastrale nr. 8561, me numër pasurie 1/911, të llojit “truall”, me sipërfaqe totale 10 000 (dhjetë mijë) m2 , në pronësi “shtet”, me vendndodhje Bashkia Korçë, pjesë e fondit të pasurive të paluajtshme për mbështetjen e investimeve strategjike, sipas dokumentacionit të pronësisë, rilevimit topografik dhe tekstit të projektkontratës, që i bashkëlidhen këtij vendimi”, thuhet në vendim.
Kjo kontratë e lidhur me 1 euro do të jetë me kohëzgjatje 20 vite, ndërsa për të realizuar projektin pritet të investohen 18.1 mln euro pa TVSH.Plani i biznesit është për të ndërtuar një hotel luksoz me 5 yje, me 5 kate dhe 94 dhoma në total.