Çmimi i energjisë elektrike nuk do të ndryshojë deri në fund të vitit. Qeveria do të përpiqet ta mbajë atë të pandryshuar edhe nga 1 janari, deklaroi sot kryeministri Hristijan Mickoski.
Duke iu përgjigjur gazetarëve pas hapjes së shkollës së re fillore në Hasanbeg, Mickoski tha se stabiliteti energjetik është përparësi e Qeverisë. Sipas tij, kjo përpjekje po zhvillohet në kushtet e krizës më të madhe energjetike në botë që mban mend njerëzimi, ndërsa çmimet e energjensave në rajon dhe në Evropë po arrijnë nivele rekord.
Ai përmendi se në disa shtete evropiane nafta dizel dhe benzina pa plumb kushtojnë mbi 3 euro për litër, kurse në vend çmimi mbetet nën 1,6 euro për litër falë politikave qeveritare. Mickoski tha se Qeveria synon të ndjekë të njëjtën qasje edhe për energjinë elektrike dhe po punon për të shmangur rritjen e çmimit, siç ka bërë në tre periudha rregullatore.
Kryeministri theksoi se SHA EMV nuk është e vetmja kompani që kërkon harmonizim të çmimeve. Në këtë proces përfshihen edhe kompani të tjera, operatori dhe distributori, kompania private EVN. Për këtë arsye, ai sugjeroi që edhe ato të pyeten për mënyrën se si do të veprojnë.
Mickoski nuk u pajtua me vlerësimin se çmimi i energjisë elektrike varet kryesisht nga EMV-ja. Ai tha se nuk do të ofrohet çmim më i ulët se 65 euro, duke shtuar se, në kushtet e sotme të bursave, edhe kjo shumë është tre herë më e ulët se ajo që paguajnë qytetarët në vendet fqinje dhe në Evropë.
Ai përsëriti se Qeveria do të përpiqet ta mbajë çmimin në të njëjtin nivel, pa rritje deri në dhjetor. Për periudhën nga 1 janari, Mickoski tha se duhet pritur qëndrimi i kompanive të energjisë dhe se nuk mund të paragjykojë vendimin e Komisionit Rregullator. Kryeministri shtoi se nuk planifikohen ndryshime në blloqet e tarifave të energjisë elektrike.
The post Mickoski: Energjia elektrike do të ruajë të njëjtin çmim deri në fund të vitit appeared first on Albeu.com.